Pemansang Jaku Iban Kemaya Haritu

Pekit Karang Jaku Iban Taun 2013... 

Sama bela nyeleti enti bisi penyilap... Nya meh chara belajar.... :-)

Pemansang Jaku Iban Kemaya Haritu

            Kediatu, jaku Iban majak mansang-semansang nyerumba singkang pemansang dunya. Penyerakai pemansang tu indah baka kulat tumbuh sepengudah ari ujan ti majak nambah enggau ngerembai.  Berindik arinya, beberapa iti elemen ke ulih diperatika dikena belematika pemansang ke udah nyadi dalam jaku Iban kemaya haritu.

            Keterubah iya, pemansang jaku Iban ulih diperatika lebuh  jeman perintah Brooke, jeman perintah Koloni enggau jeman udah merdeka (Jeman Malaysia). Sebedau jeman perintah Rajah Brooke enggau jeman perintah Koloni, menua Sarawak dipegai Sultan Brunei. Mayanya, jaku Iban nadai entu besai guna kelimpah ari jaku dikena bekomunikasyen besehari-hari, pengawa perintah, bedaja, berandau sereta beperindang.

            Nitihka penemu Chemaline Osup (2011), jaku Iban lebuh  jeman perintah Brooke (1841-1941) beguna nyadi jaku resmi ba menua Sarawak. Jaku tu nyadi jaku resmi ketegal nyadi siti ari chara bala perintah ngerembaika pengarap Kristian ba serata menua Sarawak. Berindik ari nya, penginjil ari raban Kristian Anglikan udah numbuh siti sekula iya nya Sekula St Paul di Banting ke dikena nyadika palan ngerembaika pengajar Kristian. Ari nya tadi, jaku Iban dinyadi siti ari jaku ke diajar enggau dipelajar ba dalam sekula lalu ngeluarka katekist ti ngerembai pengarap Kristian dalam jaku Iban.

            Pemansang jaku Iban lebuh maya pegai perintah Brooke lebih beguna dikena ngerembaika pengarap Kristian ba menua tu laban bansa kitai nadai ngembuan peneleba enggau pemandai ti tinggi dalam mansutka penemu enggau buah runding sereta peneleba diri ba dalam kereban ke ditulis orang putih. Nya alai, perintah mayanya ngena jaku Iban nyadika jaku komunikasyen ngerembaika pengarap Kristian ba serata menua Sarawak.

            Urung taun 1946 ngagai 1963, menua Sarawak dipegai perintah Koloni empas ari pengawa sedadu Jipun ngerampas kuasa ari perintah Rajah Brooke. Situasyen tu udah meri empas ke besai ngagai pemansang jaku Iban laban jaku Iban mayuh dikena ba dalam pengawa perintah. Ambika chunto,  jaku Iban dikena ba dalam pengawa court dalam taun 1948. Maya nya, jaku Iban udah dikena ba aum Kunsi Nengeri lalu dikena ba court Bumiputera tauka Court penghulu. Nyadi tuju pengawa court begunaka jaku Iban ngambika penghulu nyamai ngatur sebarang pekara ti nyadi ba genterun pendiau ke dipegai iya. Ambi ke chunto, pekara ke bekaul enggau reta pesaka, ruang bilik, tanah enggau temuda.

            Dalam jeman tu, jaku Iban majak mansang empas ari jaku tu dipasukka dalam sekula. Kena taun 1955, jaku Iban diajar ba sekula sekondari ke dikangau Asian Language  sereta dipasukka dalam peresa Sarawak Junior Certicate (SJC). Urung taun 1957, pelajar jaku Iban ke diajar ba sekula dikangau ‘ Sea Dayak’ lalu penama nya ditukar ngagai ‘ Iban Language’ kena ke taun 1958. Maya taun tu, turai pelajar jaku Iban nadai ngembuan atur ti meruan sereta bala pengajar semina ngajar enggau nyediaka kereban ngajar ti diasaika engkeman lebuh sida ngajar. Dalam taun 1964, siti turai jaku Iban sekula sekondari iya nya ‘ The Cirricular And Sylabuses Of Junior School’ udah ditempa lalu disimpan ba ‘Sessional Paper No. 3 Of 1963’.

           

            Nambahka nya, Dewan Undangan Negeri Sarawak udah ngemendarka jaku Iban diajar sepengelama 120 minit iya nya tiga riris aja dalam seminggu. Berindik arinya, Borneo Literature Bureur (BLB) ditumbuhka dikena ngemansangka pengawa nulis, ngarang sereta ngumpul jerita sereta kereban litaricha jaku Iban. Tang dalam taun 1976, BLB angus ngunjungka meri empas ngagai pegawa nulis enggau ngajar dalam jaku Iban. BLB diganti enggau Dewan Bahasa dan Pustaka (DBP). Taja pia, DBP nadai ngumpul kereban litaricha jaku Iban laban enda ngemendar sereta nyelak kereban ke ditulis dalam jaku Iban. Ari situasyen nya tadi, iya udah meri empas ke balat besai ngagai pemansang jaku Iban laban iya ngelubahka proses ngemansangka jaku Iban.

             Dalam taun 16 September 1963, Sarawak enggau Sabah begabung enggau Malaya dikena nempa menua Malaysia. Fungsyen jaku Iban maya tu majak ngerembai nitihka pemansang menua. Maya jeman tu, jaku Iban beguna dikena bekomunikasyen, dikena ba dalam sekula sereta nyadi jaku ekonomi. Chunto iya dalam taun 1987, pengajar jaku Iban udah besetuju numbuhka siti gerumpung iya nya ‘Iban Language Teacher Assosiation’.  Jaku tu mega beguna dikena naburka berita ba dalam churung radio baka ba RTM Sarawak enggau Cats FM. Nambahka nya, jaku Iban beguna dikena mantaika penemu senentang jaku Iban enggau daya idup Iban ba dalam kereban tulis. Ambika chunto, baka Majalah Pengari, Majalah Tebilang, Berita betanam betupi enggau mayuh agi. Ari nya, iya nyadi siti chara dikena nempa raban bansa Iban mansutka penemu engga buah runding sesentang sesebengkah pekara.

            Kena 26 Disember 1975, Akta Pelajar 1996 ditempa. Dalam akta tu, jaku Iban dipasukka dalam peresa Sarawak Junior Certificate (SJC) . Tang dalam taun 1977,  peresa SJC berubah bali nama ngagai Lower Certificate of Education (LCE). Empas ari nya, format peresa jaku Iban ditempa baru iya nya nembiak nadai agi dipinta ngalihka jaku Iban ngagai jaku English tauka jaku English ngagai jaku Iban. Dalam urung taun 1988, Opis Pelajar ngemasukka jaku Iban ba sekula primari rendah. Bala pengajar kena ngajar jaku Iban bisi berasai lantang dalam ngatur proses ngajar enggau belajar laban turai pelajar jaku Iban ari Pom 1 ngagai Pom 3 udah disediaka. Jaku Iban majak dikemansangka nengah chara ngemansukka jaku Iban siti ari pelajar ke diajar ba Pom 5 kena taun 2008. Berindik ari atur ke digaga nya, jaku Iban majak ngerembai ari sukut pelajar.

            Dalam taun 2010, Jaku Iban dipasukka nyadi siti subjek elektif ke diajar ba Universiti Pendidikan Sultan Idris (UPSI). Jaku Iban ke dipelajar ba UPSI nyadi siti berita ke pemadu manah dikena ngemansang raban bansa kitai. Kebuah pia, jaku Iban udah diajar ba tikas minor. Nyadi, orang ke mangku pengawa ngatur kus subjek jaku Iban ba UPSI iya nya Dr. Chemaline Anak Osup. Dalam taun 2013,  UPSI udah nyediaka dua bengkah kus baru bekaul enggau subjek jaku Iban. Kus baru ke disediakan UPSI iya nya Ijazah Sarjana Sastera (Jaku Iban) enggau Ijazah Doktor Falsafah (Phd) (Jaku Iban). Ari kus nya tadi, dia kitai ulih belematika guna jaku Iban jeman kediatu majak mansang semansang.

            Dalam taun 2011, jaku Iban udah dipasuk nyadi siti subjek major ba tikas Institut Pendidikan Guru (IPG). Jaku Iban ke diajar ba IPG iya nya siti ari kursus ke dikangau ‘Kursus Perguruan Lepasan SPM’. Nyadi, kus tu nyediaka jaku Iban diajar naka tikas ijazah. IPG ti keterubah nyediaka kus tu iya nya Institut Pendidikan Guru Kampus Rajang lalu nembiak ti keterubah dalam kus tu iya nya sepemayuh 20 iku. Nyentukka taun tu, penyampau raban ke benung ngambi kus jaku Iban ba IPG iya nya empat iti raban. Dalam taun 2014 tu mega, Institut Pendidikan Guru Sarawak (IPG Sarawak, Miri) mega nyediaka kus tu lalu nerima siti raban belajar kus jaku Iban tu. Arinya, kitai ulih belematika pemansang guna jaku Iban majak ngerembai.

            Nitihka penemu Chemaline Osup (2014),  pengawa ngajar enggau belajarka jaku Iban ba tikas Institut Pendidikan Guru (IPG) enggau Universiti dikena ngelatih nembiak ngambika sida kompetan dalam komunikasyen ngena jaku Iban standard dalam mayuh bengkah konteks, bepikir sechara kreatif enggau kritis, analitikal, inkuisitif sereta inovatif. Berindik ari nya, mayuh macham chara ke dikena sekali sechara teori tauka amali dikena ngelatih nembiak ngambika ulih nempa nembiak ke ngembuan penteba-penteba ke udah dirintaikanya.

           

            Ari jeman Rajah Brooke dataika jeman udah merdeka, dia kitai ulih beratika pemesai guna sereta pemansang jaku Iban. Kediatu, jaku Iban udah dikemansangka nyadi siti ari jaku intelektual ke beguna dikena mantaika buah runding, buah runding ke spesifik sereta bejuraika sesebengkah pekara. Mayuh macham chara ke digaga dikena ngemansang sereta nyungkakka jaku Iban ngagai tikas ke tinggi agi.

            Siti ari chara iya nya numbuhka beberapa iti gerempung ke beguna ngemansang pelajar jaku Iban. Chunto iya Gerempung Association for the Educational Development of Iban Language (AEDIL). Siti ari tuju gerempung tu ditumbuhka iya nya ngemansangka pelajar jaku Iban bepelasarka Dasar Pelajar Menua enggau Filosofi Pelajar Menua sereta meri sukung, penemu enggau runding ngagai polisi lalu ngetanka guna pelajar jaku Iban. Ari gerempung bakatu tadi, jaku Iban ulih diseruri enggau lenak sekalika ari sukut chara ngajar, pekara ke dipelajar dalam jaku Iban sereta guna jaku Iban jemah ila. Nya alai, jaku Iban majak mansang semansang laban raban bansa Iban majak ngemeratka jaku Iban nyadi siti ari pekara ke dipelajarka ba balam sekula, univesiti enggau palan pematih pengajar.

            Simpul iya, jaku Iban majak mansang semansang nitihka singkang pemansang menua. Pekara tu chukup manah dikena nempa raban bansa Iban ke bepenemu, ngembuan intelektual ke tinggi sereta bela nyungkakka diri dalam semua pengawa. Nya alai, jaku Iban diatu majak besai guna lalu meri empas ngagai pengidup raban bansa Iban.