UBAH PEMANSANG MAIN
ASAL NGAJAT IBAN
Ngajat sebansa ari main asal tauka
tanda bansa Iban ke diau ba menua Sarawak. Main asal ngajat tu siti ari lanting
ti ditinggal bala aki ini menya lalu ditunda kitai ke rebak diatu. Ngajat tu
endang siti ari tanda ke chukup tebilang lalu nyadi kelai ngagai daya idup
Iban. Main asal tu enyau majak berubah nitih ubah singkang pemansang dunya.
Ubah bakatu tau meri empas sekalika empas ke manah tauka enda manah ngagai main
asal tu.
Nitihka Chemaline (2011), penatai main
asal Iban ngajat tu ada seretai enggau penemu Iban senentang pengawa betabuh ke diajar Orang
Panggau Libau enggau orang Gelung Batu Nakung lebuh maya bansa Iban agi semenua
enggau orang Panggau Libau ba menua Tembawai Bejuah. Pengawa betabuh nyadika pugu
dikena ngepun enggau ngiring orang ke ngajat sereta dimanahka agi enggau
bekenaka ngepan. Ba senentang pengawa
betabuh tu, penyampau orang ke ngereja pengawa tu iya nya empat iku lalu sida
beguna dikena nabuh kereban tabuh Iban baka engkerumung, bebendai, tawak enggau
ketebung. Penyikar tauka pengelubah orang ke ngajat nya bepanggai enggau
penyampat orang ke nabuh. Nya alai,
baka sempama gitar nadai tali, baka cincin lenyau pemata enti nyema main asal
ngajat tu enda disempulangka enggau pengawa betabuh laban kedua-dua main tu
enda ulih diseraraka.
Nitihka pansik Coral Ruberstein (1973), bansa Iban ngembuan mayuh macham bansa tanda.
Bansa ajat ke dibantai tu bepanggai ba guna iya ba sesebengkah pengawa. Kemaya hari tu, bansa ngajat ke suah
dibantai baka ngajat ngelaluka pengabang, ngajat pua kumbu, ngajat bebunuh sereta
ngajat lesung. Ambika chunto ngajat bebunuh, siti ari bansa
ajat ke dikena meransang sida ke lelaki sebedau nurun nyerang tauka ngayau munsuh. Ajat tu siti ari
atur adat sebedau pungka lelaki nurun ngayau ngambika sida berani lebuh ngelaban
munsuh . Bungai ajat ti dikena sikar lalu disempulangka enggau bunyi rauh ke
nyaris sereta mai terabai ke diukir bechura buah ‘Gerasi’ sereta ilang ti
rimbun bejejabong bok munsoh dikena mantaika penggering diri. Nitihka Anthony (1962),
adat Iban kelia bisi ngaga atur iya nya lelaki ulih bebini sereta ulih dikangau
‘ Bujang Berani’ enti iya udah bulih pala munsuh lebuh nurun ngayau. Nya alai,
atur adat sereta ngajat bebunuh tu beguna dikena meransang bala sida ke lelaki
nurun ngayau dulu suba ngambika ulih disemaka baka mang ari kepayang rendam
sepagi, munuh ari ipuh ujung Jenggi, nyaing ari puting mata geraji.
Main asal ngajat tu beguna bendar dalam kaul sereta daya idup
bansa Iban. Dulu kelia, ngajat tu nyadika chara dikena bebungah sereta bebuti
enggau pangan diri ngambika ulih ngelagu pengerami awakka majak rami sereta
rachuh. Kebuah pia, dunya apin bisi kereban pemerindang baka kemaya hari tu. Ambika
chunto baka ajat kelulu ke suah dikena
orang bebungah enggau bebuti sereta mantaika pengelandik diri ngaga bungai ajat
ke tau ngasuh orang ketawa. Nambahka agi, bunyi tabuh endang diasuh laju
ngambika orang ke ngajat jampat agi mantaika bungai ajat iya. Nya alai, main
asal ngajat suba nyadi siti chara dikena ngerami siti-siti pengawai kelebih agi
maya hari Gawai enggau pengerami melah pinang.
Ari main asal tu mega, iya beguna
dikena ngayanka tabi basa kitai ngagai temuai ke bisi nemuai ngagai rumah
panjai. Baka ke diatu, ngajat ngalu pengabang dikena meri basa ngagai menteri,
bala pemesai sereta temuai ke bisi nemuai ngagai rumah panjai. Besenutuk ari
nya, dia kitai ulih beratika nilai budi basa ke bisi ayan dalam daya idup orang
Iban. Nya kebuah ajat ngalu pengabang bisi dibantaika dikena mandangka penyiru
sereta pementas sereta mandangka raban bansa Iban enda nempayaka temuai ke bisi
datai. Nya alai, tiap kali bisi pengawa,
ajat ngalu pengabang suah dibantai dikena muka sesebengkah pengerami ngambika
ulih nyadi ke buah kenang sereta tanda pengingat sida maya nemuai ngagai menua
nya.
Kelimpah ari nya, main asal ngajat
tu beguna bendar nyadika siti chara ngayanka daya idup sereta adat pendiau
bansa Iban. Guna tu ulih diperatika ba ajat indu ari sukut bungai ajat sereta
liut tubuh ke lundai ke dipantaika. Ambi ke chunto baka ngajat ngauk ai, ngajat
pua kumbu enggau mayuh agi. Ari bungai ajat ke dipantai nya, iya ulih mandangka
daya idup raban bansa Iban kelia menya lebuh diau ba rumah panjai. Pia mega,
ajat lelaki baka ngajat bebunuh mandangka pengering lelaki Iban ngenanka menua
diri ari munsuh. Berindik ari nya, main
asal tu ulih ngayanka daya idup bansa Iban lalu semampai dipantaika ngambika
rebak ke baru nemu pendiau bansa Iban ari kelia menya.
Nitihka ubah singkang pemansang, guna main
asal ngajat majak ngerekai. . Ke diatu, main asal ngajat tu dikelala nyadi siti
tanda ke dikena merindang bala mayuh tajapan suba tanda tu bepelasarka pengawa
tauka pengerami ke diatur Guna iya ukai semina ba genturung rumah panjai tang
ke diatu main asal tu mega dibantaika ba pengerami-pengerami formal sereta
institusyen-institusyen pelajar. Ambika chunto baka pengawa ‘Borneo
Culture Festival’ (BCF), hari Gawai Dayak, Borneo Hornbill Festival ( BHF) enggau mayuh agi. Palan pemerindang baka ‘Sarawak Culture Village’ mega bisi mandangka main asal ngajat tu. Berindik
ari nya, tanda main asal ngajat tu majak dikelala di mata dunya sereta
dikerinduka raban bansa bukai kelebih agi temuai ari menua bukai baka kulat ke
tumbuh sepengudah hari ujan .
Berindik ari nya, main asal ngajat
tu ukai semina ditemu enggau dipelajar raban bansa Iban aja. Tang iya mega
dipelajar raban bansa bukai ke rinduka tanda ngajat tu. Maya bisi pengerami ke
resmi, dia kitai ulih beratika bisi raban bansa bukai ke landik mantaika main
asal Iban tu. Ambi ke chunto baka ‘ Hari Merdeka’ , bisi bansa bukai ke sama
bela enggau mandangka main asal tu lalu ukai semina raban bansa Iban aja ke ngajat.
Nya alai, tarit main asal ngajat tu chukup besai dikena nyerakup kitai enggau
raban bansa bukai ngambika kitai ngerapat ke kaul diri sama diri.
Nambahka nya agi, mayuh komuniti enggau
gerempung ke bisi ngatur kus belajar
ngajat ngagai orang ke rinduka main asal tu. Atur kus belajar ngajat tu dikena
ngenanka main asal ngajat ngambika enda lenyau ditaban arus pemansang dunya.
Ari kus belajar ngajat nya, iya ulih nyadika siti chara dikena ngemayuhka raban
bansa belajar sereta landik ngajat ngambika ulih ngenanka waris daya idup tu.
Ambi ke chunto baka Gerumpung Dayak Miri ke diketuai Roseline Minggang udah
ngatur siti kelas belajar ngajat dikena
ngenanka pemanah sereta penulin main asal ngajat. Gerempung Daya Idup Iban Sri
Aman mega bisi ngatur kus ngajar ngajat ngagai semua pupu raban bansa ke
rinduka main asal tu. Dalam kus nya, gerempung nya bisi nerima pupu raban bansa
baka Cina, Bidayuh enggau Melayu maya kus ngajar ngajat nya diatur. Nya alai,
guna main asal ngajat tu majak mansang-semansang lalu dikerinduka semua raban
bansa.
Pia mega, main asal ngajat tu mega
bisi diajar ba sekula enggau institusyen pelajar. Ba sekula, bala nembiak
dipatih main asal tu nengah gerempung tanda tauka Gerempung Jaku Iban. Pia mega
institusyen baka ‘ Akademik Seni Budaya dan Warisan Kebangsaan’ tauka ASWARA mega bisi belajarka main asal
ngajat ngagai pematih ke bisi ngambi kus tanda. Bakanya mega, Institusyen
pematih pengajar bisi diberi penemu senentang main asal tu nengah chara pengawa
kokurikulum tanda. Ari atur nya, iya ulih ngemansangka main asal ngajat tu
ngagai tikas ke tinggi agi kelebih agi. Kebuah pia, iya ulih meri peransang
sereta penemu ngagai rebak baru sereta bansa bukai bekaul enggau main asal Iban
tu. Main asal tu mega bisi diajar ba sekula
Ketegal ari menua ke udah mansang
sereta moden, main asal ngajat tu majak berubah nitihka singkang pemansang
dunya lalu ulih meri empas ke besai ngagai main asal tu. sekali main asal tu
berubah, iya ulih meri empas ngagai main asal tu sekalika ari sukut chara
tanda, guna sereta penulin main asal tu. Indah enda baka munyi jaku sempama ‘ sekali ai bah, sekali ga
tebing berubah’
Siti ari empas ari ubah pemansang
ngajat tu, dia kitai ulih beratika ari sukut ubah bungai ajat ke dipandangka
tauka dikena orang lebuh ngajat. Ketegal ari, main asal tu ke ulih dikunsi
sereta dipelajar orang bukai, gaya bungai ajat ke dikena diatu bisi berubah ari
ke suba. Berindik ari nya, penulin bungai ajat Iban deka lenyau enti enda
ditanka sereta dipelajarka enggau manah. Bisi
sekeda bungai ajat ke asal diubah ngagai rentak ke ‘moden’ agi. Pekara ke bakatu tau ngerusakka penulin main
asal kitai Iban.
Uji kitai beratika ajat ke suah
dipeda kitai ba rumah panjai enggau ajat ke diayanka ba panggau tauka pekit.
Bakani bisi bida tauka enda? Enti ajat ba rumah panjai, dia kitai ulih beratika
pengelundai lingguk tubuh sereta pengelandik sida ke indu ngatur bungai ajat
nitihka tiun tabuh. Pia mega, penyingkar enggau pengering lebuh lelaki ngajat
lalu disempulangka enggau bunyi rauh ke besai
berupai ayan sereta tau ngasuh orang ke meda tauka tegepang. Ajat ke ayan ba panggau tauka pekit
enda ulih mandangka penulin main asal ngajat ke bendar iya. Kebuah pia, bungai
ajat ke ayan ba panggau tauka pekit dilumpar dulu sereta belatih dikena
ngingatka bungai ajat ngambika sebaka. Nya alai, ubah pemansang kelalu balat
tau ngerusakka penulin main asal ngajat Iban.
Simpul iya, main asal ngajat tu reta pesaka ti pemadu besai reti ngagai
daya idup raban bansa Iban dikena ngetanka pengelala bansa Iban. Main asal tu
ulih yadi pengelaie ngagai bansa kitai
Iban. Rebak ke baru patut belajarka pengelandik ngajat tu kelebih nembiak bansa
Iban ngambika ulih ngetanka main asal kitai tu munyi ku rambai jaku ‘Enti ukai
saritu, kemaya agi, Enti ukai kitai, sapa agi? ulih ngentanka main asal ngajat’
Tiada ulasan:
Catat Ulasan