TEBANGKAR 2: JANANG ENSIRING

Janang ada kena 21 januari 1949 ba Temuda Ulak, Disso Saratok. Lalu anak kedua ke Ensiring seduai Lulong.

Iya besekula ba St. Peter’s School enggau Saratok Secondary School, Saratok. Iya belabuh gawa nyadi pengajar dalam taun 1969 udah bekau belatih nyadi pengajar ba Rajang Teacher’s Training College, Binatang dalam taun 1967 enggau 1968. Kenyau ari nya berengkah gawa perintah dalam taun 1969 nyentuk ke diatu. Kelimpah ari ngajar nembiak di sekula iya mega udah dikarap ka Jabatan Pendidikan Sarawak megai pengawa nyadi Guru Besai, Pengetua, Penerbit Television Pendidikan enggau Pegawai Pendidikan Daerah. Diatu iya gawa nyadi Penyelia Kumpulan ba Indu Opis Pelajar Nengeri Sarawak di Kuching.

Janang bisi bendar pengerindu ke pengawa ngarang. Dulu agi ari tu iya udah ngarang novel ‘Ngelar Menua Sarawak’, ‘Tanah Belimpah’ enggau ‘Emperan Assam Panas’. Iya mega landik ngarang drama radio enggau cherepan. Iya udah nyaup Bagi Iban Radio Malaysia Kuching nusun programme “Tusun Pendiau Iban” lalu diatu benung nusun  programme radio seminggu sekali ti dikumbai “Daya Idup Iban”. Nambah ka nya, iya bisi bendar pengelandik ngarang leka pantun ti selalu bendar ditabur ka ari Bagi Iban dalam programme “Bebalas Pantun”.

Iya udah dipadu ka Opis Pelajar Sarawak nyadi chairman Penempa Turai pelajar Jaku Iban ke sekula primary enggau sekondari. Iya mega nyadi chairman ke Panel Penulis Jaku Iban Sarawak. Diatu komiti ke betuai iya benung ngarang sereta nusun bup teks pelajar jaku Iban ke sekula primary enggau sekondari.